Thursday, June 19, 2008

12.3 စပယ်ယာလေးကျွန်တော်

ထော်လာဂျီမှာအော်တိုစတတ်တာ မပါတော့.. ကျွန်တော့်မှာ.. အင်ဂျင်ရပ်တိုင်း ဂေါက်လှည့်ရတယ်..။ ဆယ့်ရှစ်ကောင်အင်ဂျင်ကို နှိုးအောင်လှည့်ဖို့ဆိုတာ.. အတော် မလွယ်တဲ့ကိစ္စပဲ..။ နောက်ပြီး ကားလေးတွေက အခေါက်တိုင်းကျိုးတယ်..။ ဆန်အိတ်တစ်ရာဆိုတဲ့ ၀ိတ်က မနည်းဘူး..။ မောင်ရွှေကျီးကလဲ.. အဆင်းဆို.. ဟိုင်းလတ်တောင် ရအောင် လိုက်ကျော်တက်တယ်..။ အဲဒီတော့ မကျိုးခံနိုင်ရိုးလား..။

လေးကျိုးရင်.. ကျွန်တော်ဒုက္ခရောက်တော့တာပဲ..။ ကားကို ဂျက်ထောက်.. လေးထုတ်ကိုဖြုတ်..။ ကျိုးတဲ့လေးကိုယူ.. ကြုံရာကားနဲ့.. ၀ပ်ရှော့ရှိတဲ့ ရွာကို လိုက်..။ လေးဆက်ပြီး ကားရှိတဲ့နေရာပြန်လာ.. ပြန်တပ်.. ခရီးဆက်ရတာပဲ..။

တစ်ခါတစ်ရံ စိမ့်ကြီးမြိုင်ကြီး ရိပ်ကြီးတောတောင်.. ရွာမနီးမြို့မနီး မှာ..ကားပျက်တတ်သေးတယ်..။ ကားပေါ်မှာ ဒန်အိုးဒန်ခွက်အမြဲတမ်းပါလို့ ထမင်းတော့ မငတ်ပါဘူး..။ ကုန်သည်ရဲ့ ဆန်အိတ်ကို ဓါးနဲ့ဖြဲပြီး လမ်းဘေးက ထင်းအတိုအစစုပြီး ထမင်းချက်စားရတယ်..။

ဖားကန့်က အပြန်လမ်းကတော့ များသောအားဖြင့် ခါလီပဲ..။ အပြန်ကုန်ဘာမှ ရလေ့မရှိဘူး..။ ဒါပေမယ့်.. ဖားကန့်ကို စက်ဘီးနဲ့ ကြက်ရောင်းတက်တဲ့ သူတွေရှိတယ်..။ စက်ဘီးပေါ် ကြက်ခြင်းတင်ပြီး.. အသွားတုံးကတော့.. သူတို့ကိုယ်တိုင် စက်ဘီးစီးပြီး ဖားကန့်ကို ရောက်အောင်သွားကြတယ်..။

ဖားကန့်မှာ ပါလာတဲ့ ကြက်တွေ ရောင်းချပြီး အပြန်မှာတော့.. ဟိုင်းလတ်တွေ တက်စီးရအောင်ကလဲ.. စက်ဘီးကတဖက် ကြက်ခြင်းကတဖက်နဲ့ ဆိုတော့ သူတို့အတွက် အဆင်မပြေလှဘူး..။

ကျွန်တော်တို့ ထော်လာဂျီကတော့ သူတို့အတွက် အဆင်ပြေဆုံးပဲ..။ ကျွန်တော်တို့အတွက်လည်း.. အဆင်ပြေတာပဲ..။ ဘာဖြစ်လို့လဲ ဆိုတော့ သူတို့ဆီကရတဲ့ ကားခဟာ.. ကျွန်တော်တို့ ဆရာတပည့်နှစ်ယောက်အတွက်.. အပ်ရှောင်ဆိုင်မှာ.. သောက်စားဖို့ ကောင်းကောင်းလုံလောက်တယ်..။

ကြုံလို့ သူ့အရပ်နဲ့သူ့ဇာတ်အကြောင်း ပြောရဦးမယ်..။ ကာမိုင်းက လူတွေ ဓါတ်ပုံရိုက်နည်းဟာ.. အတုယူလောက်တယ်..။ အိမ်နီးနားချင်း လေးငါးရောက်စုပြီး သူတို့ ဓါတ်ပုံရိုက်လေ့ရှိတယ်..။ ရိုက်တော့လည်း တစ်ပုံတည်းပဲ..။

အိမ်မှာ ရှိသမျှ.. ကက်ဆက် ရေဒီယို တွေကို လက်ထဲမှာ ကိုင်ထားပြီး ဂရုဖိုတိုရိုက်တာပဲ..။ ဓါတ်ပုံဆရာက လူချင်းပူးခိုင်းရင်.. သူတို့ကို ဘယ်တော့မှ ပူးခိုင်းလို့မရဘူး..။ နည်းနည်းလောက်တော့ ခွဲရပ်ကြတယ်..။ ဓါတ်ပုံရလာမှ ကိုယ့်ပုံကိုယ် ကပ်ကြေးနဲ့ ညှပ်ယူကြတယ်..။ တစ်ပုံတစ်ရာကျရင်.. တစ်ယောက်မှ နှစ်ဆယ်လောက်ပဲ ကျတယ်..။ ဘဲရီးအီကော်နော်မီ ပေါ့..။

ဖားကန့်နဲ့ကာမိုင်းနဲ့ မိုင်လေးဆယ်ခရီးမှာ.. စစ်တပ်ဂိတ်လေးငါးခု ရှိတယ်..။ အဲဒီဂိတ်တွေမှာ.. အချိုရည်ဗူးဝယ်ရတယ်..။ အဲဒီတုံးက.. နှစ်ရာတန်ငါးရာတန် တစ်ထောင်တန် မပေါ်သေးဘူး..။ ဖားကန့်ဖက်မှာ.. ကိုးဆယ်တန်ကို အကြီးတစ်ရွက်လို့ ခေါ်တယ်..။ လေးဆယ့်ငါးကျပ်တန်ကို အသေးတစ်ရွက်လို့ ခေါ်တယ်..။

စီးပွားရေးဖြစ်ထွန်းနေတဲ့ ဒေသဆိုတော့.. ဘာစားစား ဘာဝယ်ဝယ်.. လေးဆယ့်ငါးကျပ်ဆိုတာ.. အနည်းဆုံး .. ငွေကြေးယူနစ်ပဲ..။ ( အခုတော့ မသိတော့ဘူး.. )

ရှမ်းခေါက်ဆွဲတစ်ပွဲ ဘယ်လောက်လဲ လို့ မေးရင် အသေးတစ်ရွက်လို့ ပြန်ဖြေလေ့ရှိတယ်..။

ကျွန်တော်တို့ထော်လာဂျီဆိုရင်.. ဂိတ်တစ်ခုရောက်တိုင်း.. ကျွဲရိုင်း နှစ်ဗူး အနည်းဆုံးဝယ်ရတယ်..။ တစ်ဗူးကို .. အသေးသုံးရွက်ပေးရတယ်..။ တစ်ရာ့သုံးဆယ့်ငါးကျပ် ပေါ့..။ ဖားကန့်အရောက် ဂိတ်က လေးငါးခု ရှိတာဆိုတော့.. အချိုရည်ဗူးဖိုးတင်.. တစ်ထောင့်ငါးရာ နှစ်ထောင်လောက်ကုန်ရော..။

ဆရာရယ်.. ကျွန်တော်တို့ထော်လာဂျီက.. ဘုန်းကြီးကျောင်းက ကားပါ.. တစ်ဗူးပဲ ၀ယ်ပါရစေ.. ဆရာလည်း ကုသိုလ်ရပါတယ်.. လို့ တောင်းတောင်းပန်ပန်ပြောရင်တော့.. တစ်ဂိတ်တစ်ဗူးလောက်နဲ့ ကိစ္စပြီးလေ့ရှိတယ်..။

စပယ်ယာကျွန်တော်မျိုးကတော့.. ဂိတ်နားမရောက်ခင်.. ထော်လာဂျီပေါ်က အပြေးဆင်း.. အကြီးအသေး လေးငါးရွက်ကို ကျစ်ကျစ်ပါအောင်ဆုပ်ရင်း.. ဆရာသမားများ သတ်မှတ်ပေးတဲ့.. အချိုရည်ဗူးကို ကျသင့်ငွေကြေးပေးဆောင်ပြီး ၀ယ်ရပါတယ်..။

တရုတ်နီအင်ဂျင်တပ်ထားတဲ့ ထော်လာဂျီဆိုတော့.. ချောင်းဘေးမြောင်းဘေးနားရောက်တိုင်း ရေဆင်းခပ်ရသေးတယ်..။ အင်ဂျင်က ရေအမြဲဆူနေလေတော့.. ရေလဲ လဲ ပေးရတယ်..။

ကုန်းအတက် ရောက်ပြီဆိုရင် ထုံးစံအတိုင်း ဂျမ်းတုံးကိုင် နောက်ကလိုက်ပေါ့..။ ဒါပေမယ့် တချို့အတက်တွေက.. လမ်းသိပ်ကျဉ်းတယ်..။ တစ်ဖက်က ကားဆင်းလာတာကိုလည်း မမြင်ရဘူး..။ ကိုယ့်ကားတက်လာရင်.. အဆင်းကားတွေက.. လမ်းကျယ်တဲ့နေရာကနေ.. ရပ်စောင့်နေရတယ်..။ နှစ်စီးရှောင်လို့ မလွတ်ဘူး..။

အဲဒီလိုအတက်မျိုးဆိုရင်.. ကျွန်တော်က.. ဆရာမောင်ရွှေကျီးနဲ့ ထော်လာဂျီကို အောက်မှာ ထားခဲ့ပြီး.. ကုန်းထိပ်တက်.. တဖက်အဆင်းကား ကြည့်ပေးရတယ်..။ အဆင်းကားရှင်းမှ.. ဆရာမောင်ရွှေကျီးကို တက်ခဲ့လို့ အချက်ပြရတယ်..။

တစ်ခါတုံးက.. ကျွန်တော် ကုန်းထိပ်တက်ကြည့်ပြီး .. တဖက်အဆင်းကား ရှင်းတာနဲ့.. ဆရာမောင်ရွှေကျီးကို တက်ခဲ့လို့.. အချက်ပြလိုက်တယ်..။ ဆရာမောင်ရွှေကျီး.. လီဗာကို အသားကုန်နင်းပြီး ထော်လာဂျီနဲ့ တက်လာတာ.. လမ်းတ၀က်လောက်ရောက်နေတုံး.. ဟိုင်းလတ် တစ်စီးက ဗြုန်းဆို.. ဆင်း ချလာတယ်..။ ဟိုင်းလတ်တွေက.. တအားမောင်းတော့.. ကျွန်တော်တက်ကြည့်တုံးက.. မရှိဘူး..။ ကျွန်တော်က မောင်ရွှေကျီးကို တက်ခဲ့လို့ ပြောပြီးမှ.. ဗြုန်းဆို ရောက်လာတာ..။

အတက်အဆင်း ခေါင်းချင်းဆိုင်ပြီး.. နောက်ကားတွေပါ.. ပိတ်ကုန်ရော..။

မောင်ရွှေကျီးက ကျွန်တော့်ကို ငါကိုင်တုတ်ပါလေရော..။ ကျွန်တော်လည်း အားကျမခံ.. မိုးမွှန်အောင် ပြန်ဆဲပေးလိုက်တယ်..။ အဲဒီလိုမျိုး ဆရာမောင်ရွှေကျီးနဲ့ နှစ်ပါးသွားကတာမျိုး ကို ဖားကန့်ကအပြန်.. ကျောင်းပြန်ရောက်ရင်လည်း.. က ရသေးတယ်..။

ကျောင်းမှာက ကျွန်တော့်ဘော်ဒါ ဦးဇင်းအပြင် နောက်ထပ် ဦးဇင်း နှစ်ပါးရှိသေးတယ်..။ သူတို့ရဲ့ အစွယ်အပွား ကပ္ပိယတွေကလည်း.. မနည်းဘူး..။

ကျွန်တော်နဲ့ မောင်ရွှေကျီးက.. ကားသမားတွေဆိုတော့.. ကျောင်းရဲ့ ဝေယျာဝစ္စ ဘာမှမလုပ်ဘူး..။ အဲဒါကို.. ကျန်တဲ့ ကပ္ပိယတွေက.. မကြည်ချင်ဘူး..။ သူတို့က ကျောင်းရှိလူကုန်စားဖို့သောက်ဖို့ ချက်ပြုတ်စီစဉ်ကြရတယ်..။

အချိန်တန်လက်ဆေးပြီး ၀င်စားတဲ့ ကျွန်တော်တို့ဆရာတပည့်နှစ်ယောက်ကို.. သူတို့က ပညာပေးတယ်..။ ဟင်းကောင်းကောင်းဆိုရင်.. သူတို့က ၀ှက်ထားလေ့ရှိတယ်..။ ကျွန်တော်တို့ကလည်း.. ၀ှက်ထားတာကို တွေ့ရရှာပြီး.. ကုန်အောင်စားပစ်ကြတယ်..။

အဲဒီလိုနဲ့ပဲ.. မိုးလေး တပြိုက်နှစ်ပြိုက်ရွာတဲ့ အချိန်ကို ရောက်လာခဲ့တယ်..။ မိုးတကယ်ရွာရင်.. ဖားကန့်လမ်းက.. မြေလမ်းဆိုတော့.. ကားတွေ သွားမရတော့ဘူး..။ ( အခုတော့.. လမ်းတွေ ကောင်းသွားလောက်ရောပေါ့.. )

မိုးဦးကျခါစမှာတော့... သိပ်ပြဿနာမရှိပါဘူး..။ လမ်းတွေကလည်း.. ဒီလောက်မပျက်သေးဘူး..။ ဒါပေမယ့်.. သုံးလေးရက်ဆက်.. မိုးရွာလိုက်တာနဲ့.. လမ်းက ပျက်တော့တာပဲ..။

တစ်ချို့ တောင်တက် ကွေ့ တွေနားမှာဆိုရင်.. ဘယ်ကားမှ.. မတက်နိုင်တော့ဘူး..။ လမ်းချော်ပြီး ချောက်ထဲကျတဲ့ကားက..ကျ ကုန်တယ်..။ အဲဒီလို ကွေ့နားမှာ.. ဆင်တစ်ကောင်နှစ်ကောင်အမြဲရှိတယ်..။ ဆင်သမားက.. ကားတွေ ဒုက္ခရောက်တာကို.. ထိုင်စောင့်နေတယ်..။

လမ်းချော်ပြီးမတက်နိုင်တဲ့ကားဆိုရင်.. တစ်စီး .. တစ်သောင်းပဲ..။ ဆင်နဲ့ ဆွဲတင်ပေးတယ်..။ ဟိုင်းလတ်တွေ ဒိုင်နာတွေ.. ဆင်ကုိုပဲ အားကိုးကြရတယ်..။ ကျွန်တော်တို့ ထော်လာဂျီက နာမည်ကသာ ထော်လာဂျီ.. ဖိုးဝှီးဒရိုက်.. အထင်မသေးနဲ့..။ တော်တန်ရုံအတက်ကတော့.. အေးဆေးပဲ..။

မှတ်မှတ်ရရနောက်ဆုံးအခေါက် ဖားကန့်ကအပြန်.. လုံးခင်း နားအရောက်.. မိုးတွေက ညှို့လာတယ်..။ ( လုံးခင်းဆိုတာ.. ဖားကန့်နားက.. တောမြို့လေးပေါ့..) ကျွန်တော်တို့ ထော်လာဂျီပေါ်ကို.. ဟိုင်းလတ်ပေါ်က.. ခရီးသည်တွေ.. အလုအယက်ပြောင်းလာကြတယ်..။

မိုးသည်းရင်.. ဟိုင်းလတ်က လမ်းမှာဒုက္ခရောက်တော့မှာကိုး..။ ထော်လာဂျီက ဖိုးဝှီးဆိုတော့.. ဟိုင်းလတ်ထက် စိတ်ချရတယ်..။ အဲဒါကြောင့်.. ဟိုင်းလတ်ပေါ်က ခရီးသည်တွေ.. ထော်လာဂျီပေါ်ပြောင်းလာကြတာပဲ..။

ကျွန်တော်နဲ့ မောင်ရွှေကျီးတို့အတွက်ကတော့.. စားရကံကြုံလို့ မုတ်ဆိတ်ပျားစွဲတာပေါ့..။ ရသမျှ ပါစင်ဂျာကို .. စုပြုံတင်ပြီး.. ခရီးဆက်ခဲ့ကြတယ်..။ ထင်တဲ့အတိုင်း.. လုံးခင်းကထွက်ရုံရှိသေး.. မိုးသည်းတော့တာပဲ..။

မိုးသည်းချက်ကတော့.. ထော်လာဂျီတောင် ယက်ကန်ယက်ကန် တက်ရတယ်..။ တချို့နေရာ တွေမှာ..လမ်းချော်လွန်းအားကြီးလို့.. ကားဘီးကို ချိန်းတပ်ရတယ်..။ သံကြိုးတွေနဲ့ ယက်ထားတဲ့ ချိန်းကို ကားဘီးမှာ..စွတ်ပြီး .. ခရီးဆက်တာပဲ..။ လမ်းကတော့ ပျက်ကရောပဲ..။


1 comment:

kyaw said...

ဟုတ်တယ်အကိုရေ..ကျွန်တော် ဆိုက်ထဲမှာလုပ်တုန်းကလည်း ဘီးတွေကိုချိန်းတပ်ရုန်းရတာတွေ့ ဘူးတယ်ဗျ