Saturday, June 21, 2008

12.1 ကာမိုင်းကိုအသွား

သိပ်ချစ်တယ်ဆိုတာ..သိပ်အားတဲ့လူတွေ.. မူပိုင်ယူထားတဲ့ စကားလုံး ဖြစ်ကောင်းဖြစ်မယ်..။ ညလေးနဲ့ ပတ်သက်တဲ့ အလွမ်းဇာတ်ကို .. မြ၀တီဇာတ်လမ်းတွဲတွေလို.. တမေ့တမော ..ဆက်ကလောက်အောင် အထိတော့ ကျွန်တော်နှလုံးသားက မသန်စွမ်းခဲ့ဘူး..။

အချိန်တန်ကျောင်းတွေပိတ်တော့.. နောင်နှစ်အတွက် ကျောင်းစားရိတ်..ဘယ်က ရမလဲဆိုတဲ့ မေးခွန်းက.. ကျွန်တော့်ကို နှိပ်စက်နေခဲ့တယ်..။ ရွာပြန်ပြီးကျုရှင်ဆရာလုပ်ရတာကိုလည်း.. အတော့်ကို ငြီးငွေ့နေခဲ့ပြီ..။ နောက်ဆုံးတော့.. ကချင်ပြည်နယ် ကာမိုင်းမြို့ကို..သွားဖို့ ဆုံးဖြတ်ချက်ချလိုက်တယ်..။

ကာမိုင်းဆိုတာ.. မြန်မာပြည်ရဲ့ ကျောက်စိမ်းမှော် ဖားကန့်နဲ့ မိုင်လေးဆယ် ဝေးတဲ့ .. မြို့ငယ်လေးတစ်မြို့ပဲ..။ ဗိုလ်ကုတို့လို ရင်းနှီးတဲ့.. ဦးဇင်းတစ်ပါးက.. အဲဒီမြို့မှာ.. ကျောင်းထိုင်ဖြစ်နေတယ်..။ ကျောင်းဆောက်ရန် ဆိုတဲ့ အကြောင်းပြချက်နဲ့ အဲဒီဦးဇင်းက.. ထော်လာဂျီနှစ်စီးထောင်ပြီး ဖားကန့်ကာမိုင်း .. ကုန်စည်စီးဆင်းရေးမှာ .. တတပ်တအားပါဝင်နေတယ်..။

ဘော်ဒါဦးဇင်းက ကျောင်းထိုင်ဖြစ်နေမှတော့.. ကိုယ့်အတွက်.. နောင်နှစ်ကျောင်းစားရိတ်.. မခက်လောက်ဘူး လို့ တွေးပြီး မန္တလေးကနေ မြစ်ကြီးနားရထားစီးပြီး ကာမိုင်းကို ထွက်လာခဲ့တယ်..။


မန္တလေးကနေ ညနေရထားနဲ့ တညလုံးစီးရတယ်..။ ရထားလမ်းကလဲ.. မကောင်းတဲ့ နေရာက ခပ်များများပါ..။ ကောလင်း ၀န်းသို အထွက်နားမှာ.. ရထားက လိပ်နှုန်းနဲ့ သွားနေတော့.. ခေါင်းထွက်ကြည့်မိတယ်..။


လျှိုတစ်ခုကို ဖြတ်ပြီး.. ရထားက.. တောင်ပေါ်တက်နေတာပဲ..။ ရထားလမ်းအောက်ဖက်မှာ.. ပေတစ်ရာ လောက်နက်တဲ့ ချောက်တစ်ခုကို တွေ့ရတယ်..။ ချောက်ထဲမှာ.. အ၀တ်စအဖြူလေးတွေ ထိုးထိုးထောင်ထောင်နဲ့ တုတ်တိုင်လေးတွေ.. စိုက်ထားတာ.. မြင်ရတယ်..။ ခန့်မှန်းခြေ.. တုတ်တိုင် သုံးလေးရာလောက်တော့ ရှိလိမ့်မယ်..။

အဲဒီတိုင်လေးတွေက.. လွန်ခဲ့တဲ့ လက .. ခေါင်းတွဲပြုတ်ပြီး တွဲသုံးတွဲနောက်ပြန်လှိမ့်ကျလို့ သေကုန်တဲ့ လူတွေ မြုပ်ထားတာ.. လို့ ဘေးနားက..ခရီးသည်က ရှင်းပြတယ်..။ စုစုပေါင်း လူလေးရာလောက် သေကုန်တယ် လို့ သူက ဆက်ပြောတယ်..။

ဖားကန့်ကို ကျောက်တူးဖို့ လာကြတာ.. မြန်မာပြည်တနှံတလျားက ဆိုတော့.. ဘယ်သူ့ဘယ်ဝှာ အလောင်းတွေမှန်းတောင် ခွဲမရတော့.. အဲဒီနားမှာပဲ.. အားလုံးကို ဖြစ်သလို မြုပ်လိုက်ကြတာပဲ .. ဆိုတဲ့ သူ့နောက်ဆက်တွဲစကားအဆုံးမှာ.. မွန်းကျပ်တဲ့ ဝေဒနာတစ်ခုကို ကျွန်တော်ခံစားလိုက်မိတယ်..။

ကျန်တွဲတွေက ခရီးသည်တွေလည်း.. ကျွန်တော်တို့လို.. တွဲအပြင်ခေါင်းပြူပြီး စုတ်တသပ်သပ်နဲ့ လုပ်နေကြတယ်..။

သူတို့သေသွားခဲ့တာကို မသိတဲ့.. ကျန်ရစ်သူတွေကတော့.. သူတို့တတွေ ငွေထုတ်ပိုက်ပြန်လာမယ့်ရက်ကို စောင့်မျှော်နေကြမှာပါပဲ...။ တချို့တချို့ ယနေ့ထက်အထိတိုင်အောင် မျှော်နေကြမယ်ထင်ပါရဲ့..။

အဲဒီဝမ်းနည်းဖွယ်ရာ တောင်ကြားကို နောက်ချန်ထားရစ်ခဲ့ပြီး.. ကျွန်တော်စီးလာတဲ့ ရထားကြီး ဆက်လက်ထွက်ခွါလာခဲ့တယ်..။ မိုးကောင်းကို ရောက်တော့ မနက်လင်းနေပြီ..။ မေးမြန်းပြီး ကာမိုင်းကားဂိတ်ဖက် ဘူတာကနေလျှောက်လာခဲ့တယ်..။

နေ့လည်ဆွမ်းမစားခင်အမှီ.. ကျွန်တော်ကာမိုင်းကို ရောက်တယ်..။ ဘော်ဒါဦးဇင်း ( ဘွဲ့အမည် ဦးနာရဒ ) ကို ဆိုက်ဆိုက်မြိုက်မြိုက် ကျောင်းမှာ တွေ့တယ်..။ မင်းလာတာအတော်ပဲ.. ထော်လာဂျီတစ်စီးမှာ.. စပယ်ယာလိုနေတယ်.. လို့ သူက ရောက်ရောက်ခြင်း အလုပ်ခန့်လိုက်တယ်..။

1 comment:

Unknown said...

တက္ကသိုလ်ကျောင်းသား ထော်လာဂျီစပယ်ယာလေးပေါ့ ခင်မျာ....