Monday, March 24, 2008

7.2 အဘိုးနဲ့ အဘွား

အဘွားနဲ့ ကျွန်တော်နဲ့က မတည့်ဘူး။ တစောင်းစေးနဲ့ မျက်ချေးပဲ။ မှတ်မှတ်ရရ ရွာကို အလှူခံလာတယ်။ အသံချဲ့စက်ကြီးနဲ့ပေါ့။ ဘယ်သူကဖြင့် ဘယ်သူဘယ်ဝါတွေကို ဦးထိပ်ထားပြီး အလှူတော်ငွေကဖြင့် ဘယ်လောက် .. လို့ အော်ကြီးဟစ်ကျယ်ပေါ့ဗျာ။ ရွာကသေးတော့ တစ်ရွာလုံးအကုန်ကြားနေတယ်။

ကျွန်တော်လဲ အားကျမခံ သွားလှူလိုက်တယ်။ "အဘိုးဖြစ်သူ.. ဦးလှမောင်.. အဘွားဖြစ်သူ.. ဒေါ်ကြီးငွေတို့ကို အမှုးထား၍ မြေးဖြစ်သူ.. မောင်ဒီလုံး က.. အလှူတော်ငွေ ဆယ်ပြား စေတနာသဒ္ဓါပေါက်စွာဖြင့် လာရောက်လှူဒါန်းသွားပါ တယ်ခင်ဗျား.. " လို့ အလှူခံတဲ့ ဘိုးတော်က အော်တော့တာပဲ။ အဘွားက သူ့နာမည် ဖျက်ရကောင်းလားဆိုပြီး အကြီးအကျယ် စိတ်ဆိုးနေတော့တာပဲ။ အဘိုးကတော့ ၇ယ်နေတယ်။

အလှူခံတဲ့သူကလဲ.. " သူလဲ သူတတ်နိုင်သလောက် လှူတာပေါ့ခင်ဗျာ.. နည်းတယ်များတယ် ပဓါနမဟုတ်ပါဘူ.. ညောင်ပင်ကြီးလောက်လှူပေမယ့် ညောင်စေ့လောက် ရချင်ရမှာဖြစ်သလို.. ညောင်စေ့လောက် လှူပေမယ့် ညောင်ပင်ကြီးလောက်အကျိုးရချင်ရမှာမို့လို့ .. ဦးလှမောင် ဒေါ်ကြီးငွေတို့၏ မြေးအလိမ္မာ မောင်ဒီလုံးရဲ့ အလှူကို သာဓု ခေါ်ပါတယ်..." ဆိုပြီး မပြီးနိုင်မစီးနိုင် လော်စပီကာနဲ့ အော်နေလေတော့.. အဘွားပိုစိတ်ဆိုးတာပေါ့..။

အဲဒီနေ့က အဘွားက ကျွန်တော့်ကို ခပ်နာနာလေး တီးတယ်။ အဘွားကျွန်တော့်ကို ရိုက်ရင် ကျွန်တော့် အဆိုးမဆိုနဲ့ဗျ လို့ ပြောတော့ အဘွားက အံမယ် မင်းကများငါ့ကို ခြိမ်းလားခြောက်လားနဲ့ ဆိုပြီး ထပ်တီးတယ်။

ကျွန်တော်လဲ အရိုက်ခံရတာကို မှတ်ထားတယ်။ တစ်ရက် အဘွားသိပ်နေမကောင်းဘူး။ ဟဲ့. . ဒီလုံး ပရုပ်ဆီဗူး ယူခဲ့စမ်း ငါခေါင်းနည်းနည်းမူးနေတယ် လို့ အဘွားက ပြောတယ်။ ကျွန်တော်လဲ ပရုပ်ဆီဗူးထဲ နွားချေးတွေ ထည့်ပြီး အဘွားကို သွားပေးလိုက်တယ်။ အဖုံးဖွင့်ပြီး အဘွားက အားရပါးရရှုတယ်။ ဘာပြောကောင်းမလဲ.. တုတ်ကိုင်ပြီး ထမိန်စွန်တောင်ဆွဲ လိုက်ရိုက်တာ.. အဘွား အဖျားပျောက်သွားတယ်။

အဘွားတို့ခြံကအကျယ်ကြီး အနည်းဆုံး တစ်ဧကခွဲလောက်ရှိတယ်။ အိမ်သာက ခြံထောင့်မှာ။ အိမ်မကြီးကနေ တော်တော်ဝေးတယ်။ မနက်စောစော အိပ်ရထ ရှုးပေါက်ချင်ရင် အိမ်သာရောက်အောင် အတော်သွားရတယ်။

ကျွန်တော်ကတော့ အိမ်ရှေ့မှာပဲ ကော့ပန်းလိုက်တာပဲ။ အိမ်ရှေ့မှာ ကျွန်တော်သေးပန်းနေတာ အဘွားမြင်ရင် .. ဒီကလေး စည်းကမ်းသိပ်မဲ့တယ်.. ရိုင်းတယ်နဲ့ အဘွားက ကောင်းချီးပေးတယ်။

အဘွား ကျွန်တော့်ကို မဆူနဲ့ဗျ.. အဘွားဆူရင် ကျွန်တော် သေးနဲ့ စာရေးလိုက်မှာ ဆိုပြီး..

"ကကြီးရရစ် လုံးကြီးတင်ဆံခတ် .. ကြီ.. ၀စ္စနှစ်လုံးပေါက်တော့ ကြီး.. သဝေထိုး င ၀ဆွဲ ငွေ.. " ပါးစပ်ကအော်ရင်း တလင်းပြောင်ပြောင်မှာ သေးကို လိုသလို ထိန်းပေါက်ပြီး အဘွားနာမည် သေးနဲ့ ရေးပစ်လိုက်တယ်။ တစ်ခါတစ်လေ သေးကြောရှည်ရင် အောက်က underline ပါ တားပေးလိုက်တယ်။

" အမယ်လေး ကိုလှမောင် တော် အလိုလိုက်လို့ တော့်မြေး ဒီလောက်မိုက်ရိုင်းနေတာ.. မဆုံးမတော့ဘူးလား.. " နဲ့ ခုနှစ်သံချီ ဟစ်တော့တာပဲ။

" ဟေ့ကောင် ဒီလုံး လာစမ်း " ဆိုပြီး အဘိုးကလဲ ကျွန်တော့်ကို နှိပ်ကွပ်တော့တာပဲ။

No comments: