Wednesday, July 30, 2008

16.1 မသာနဲ့ ဖဲဝိုင်း

အသုဘချတာနဲ့ စပ်ပြီး ရွာဖက်က ဓလေ့တစ်ခုပြောရဦးမယ်..။ ရွာဖက်မှာ.. အလောင်းဝယ်တာ ခေတ်စားတယ်..။ အလောင်းကောင်ကြီးကို အရောင်းအ၀ယ်လုပ်တာ တော့ မဟုတ်ပါဘူး..။ အလောင်းကို ဗန်းပြပြီး လောင်းကစားသမားတွေက.. ခုနှစ်ရက်ခုနှစ်လီ ဖဲဝိုင်းအကြီးအကျယ်လုပ်လေ့ရှိကြတယ်..။

မသာရှင်တွေကို လောင်းကစားဒိုင်တွေက.. အသုဘစားရိတ်ဘယ်လောက်ပေးမယ်.. ဖဲဝိုင်းလုပ်ခွင့် သူတို့ကိုပေး ဆိုပြီး.. ညှိနှိုင်းလေ့ရှိတယ်..။ အဲဒီလို မျိုး ညှိတာကို.. အလောင်းဝယ်တယ်လို့ ရွာမှာ အလွယ်ခေါ်ကြတယ်..။

မြန်မာ့ရိုးရာဓလေ့အရ.. မသာအိမ်မှာ ဖဲဝိုင်းတစ်ပတ်ထောင်ခွင့်ရှိတယ်..။ အဲဒီလိုမျိုးဖဲဝိုင်းကို ရဲဖမ်းလေ့ မရှိဘူး..။ တကယ့် ဥပဒေထဲမှာကတော့ ဘယ်လိုရှိလည်း မပြောတတ်ဘူး..။ ရွာမှာကတော့ မသာအိမ်က ဖဲဝိုင်းကို ရဲဖမ်းခွင့်မရှိဘူးလို့ နားလည်ထားကြတယ်..။

အလောင်းဝယ်တဲ့ လောင်းကစားဒိုင်က.. အယုတ်အလတ်အမြတ်မရွေး .. ဈေးတူပေးတယ်..။ သူဌေးသေလည်း ဒီဈေးပဲ..။ ဆင်းရဲသားငမွဲသေလည်း ဒီဈေးပဲ..။ သူ့ဖက်ကကြည့်တော့.. သူဌေး ဆင်းရဲသား အရေးမကြီးဘူး..။ ဖဲဝိုင်းက အကောက်ဘယ်လောက်ရမလဲပဲ အရေးကြီးတယ်..။

ဖဲဝိုင်းထောင်ခွင့်ရတာနဲ့ တနယ်လုံးမှာရှိတဲ့.. ဖဲသမားတွေကို ချိန်းတယ်..။ ပြီးတော့ ချိမ့်ချိမ့်သဲသဲ ဖဲဝိုင်းကျင်းပကြတယ်..။ သေတဲ့မသာတိုင်း အလောင်းဝယ်လို့တော့ မရပါဘူး..။ ရောင်းတဲ့သူမှ ရောင်းကြတာပါ..။ များသောအားဖြင့်တော့ မသာစားရိတ်မတတ်နိုင်တဲ့ မျက်နှာမွဲ မသာလေးတွေပဲ ရောင်းလေ့ရှိကြပါတယ်..။

အလောင်းရောင်းတာနဲ့ ပတ်သက်ပြီး ထူးထူးခြားခြား အဖြစ်အပျက်တစ်ခု ပြောရဦးမယ်..။ ရွာအနောက်ပိုင်းမှာ ဦးအောင်ကြည်လို့ ခေါ်တဲ့ အဘိုးကြီးတစ်ယောက်ရှိတယ်..။ သူ့မိန်းမက ဒေါ်လှစိန်..။ သေတာကြာပြီ..။ ဦးအောင်ကြည်က မုဆိုးဖိုကြီး..။ သူ့မှာ သမီးနှစ်ယောက် သားတစ်ယောက်ရှိတယ်..။ တစ်ရက် ဦးအောင်ကြည် အကြီးအကျယ် နေမကောင်းဖြစ်တယ်..။ အသက်ကလည်း ကြီးတော့ အိပ်ရာထဲ ဘုန်းဘုန်းလဲ တော့တာပေါ့..။ ငွေရေးကြေးရေးကလည်း ချို့တဲ့ရှာတော့.. ဆေးလည်း မယ်မယ်ရရ မကုနိုင်..။ တတ်သမျ စွမ်းသမျ ဆေးမြီးတိုနဲ့ ကု ဆိုတော့ အခြေအနေက ပိုပိုပြီးပဲ ဆိုးလာခဲ့တယ်..။

နောက်ဆုံးတော့ သားသမီးတွေကိုယ်နှိုက်က လက်လျော့ထားလိုက်ကြတဲ့အထိပဲ..။ သေမယ့်နေ့ကိုပဲ စောင့်နေကြတော့တယ်..။ ဦးအောင်ကြည်ကြီး သေတော့မှာ.. မနက်လား ညလားပဲ ဆိုတဲ့ သတင်းကလည်း တရွာလုံး ပြောနေကြပြီ..။ အားလုံးက သေမှာပဲ လို့ တထစ်ချ ယုံထားလိုက်ကြတယ်..။

ဖဲသမားတွေကလည်း မျော်တလင့်လင့်ပေါ့..။ အဆိုးဆုံးက အလောင်းဝယ်တဲ့ ၀င်းဖေ..။ ဦးအောင်ကြည် အခြေအနေမကောင်းဘူးလို့ ကြားကတည်းက လူစုထားပြီးပြီ..။ အားလုံးအဆင်သင့် ရယ်ဒီပဲ..။ ဒါပေမယ့် ဖြစ်ချင်တော့ ၀င်းဖေမှာ အပြိုင်အဆိုင်ပေါ်လာတယ်..။ အလောင်းဝယ် ဖဲဝိုင်းထောင်ပြီး ၀င်းဖေ လက်ဖျားငွေသီးနေတာကို မြင်ပြီး ကိုတိုးအောင် ဆိုတဲ့ ရွာသားကလည်း.. ၀င်းဖေလုပ်သလို လိုက်လုပ်လာတယ်..။ သူတို့နှစ်ယောက်က အပြိုင်တွေဖြစ်လာခဲ့တယ်..။

ဦးအောင်ကြည်ကိစ္စမှာတော့ တိုးအောင်ထက် လက်ဦးအောင် ၀ယ်မှ ဖြစ်မယ်လို့ ၀င်းဖေတွေးတယ်..။ ဦးအောင်ကြည်ကလည်း သေဖို့ သေချာနေပြီဆိုတော့.. ဦးအောင်ကြည်ရဲ့ သမီးအကြီး ခင်ဝင်းကြည် နဲ့ ၀င်းဖေ သွားတွေ့တယ်..။ အကယ်လို့များ တိုးအောင် လာညှိရင် လက်မခံဖို့နဲ့ တိုးအောင်ကူမယ့် ငွေထက် သူပိုပေးမယ်လို့ ခင်ဝင်းကြည်ကို ပြောခဲ့တယ်..။ တိုးအောင်ကလည်း အားကျမခံ ခင်ဝင်းကြည်ကို ၀င်းဖေ ပြောသလို ပြောတယ်..။ ဈေးကွက်အပြိုင်အဆိုင်က ပြင်းထန်လာခဲ့တယ်..။

ခင်ဝင်းကြည်တို့ ခမျာလည်း.. ကိုယ့်အဖေမသေသေးဘဲ လာဈေးညှိနေတဲ့ ၀င်းဖေနဲ့ တိုးအောင်ကို စိတ်ဆိုးရ ကောင်းမှန်းတောင် မသိရှာကြပါဘူး..။ အသုဘစားရိတ်အတွက် တနည်းတဖုံ အထောက်အပံ့ဖြစ်တယ်ဆိုပြီး ကျေးဇူးတောင် တင်နေရှာတယ်..။

နောက်ဆုံးတော့ ဈေးကွက်ဆုံးရှုံးမှာကြောက်တာနဲ့ ၀င်းဖေက ခင်ဝင်းကြည်ကို လက်သိပ်ထိုးပြီး ဘယ်လိုမှ မအောက်မေ့ပါနဲ့.. လိုအပ်တာရှိသုံးဖို့ဆိုပြီး ငွေငါးထောင် ပေးတယ်..။ စရံ သဘောဆန်ဆန်ပေါ့..။ ခင်ဝင်းကြည်ကလည်း ယူတယ်..။ အဲဒါကို သိတဲ့ တိုးအောင်က အသုဘစားရိတ်အားလုံးနဲ့ ရက်လည်ဆွမ်းသွတ်သည်အထိ တာဝန်ယူတဲ့အပြင် ဖဲဝိုင်းက ရတဲ့ အကောက် ဆယ်ရာခိုင်နှုန်းပေးဦးမယ် လို့ ခင်ဝင်းကြည်ကို ဈေးဖွင့်တယ်..။

တိုးအောင်ပြောတဲ့ အစီအစဉ်က မငြင်းသာအောင် ဖြစ်နေလေတော့ ခင်ဝင်းကြည် သဘောတူလိုက်တယ်..။ တိုးအောင်နဲ့ သဘောတူလိုက်တာကို ကြားတဲ့ ၀င်းဖေက ပေးထားတဲ့ ငွေငါးထောင် ဒေါ်သတကြီးနဲ့ ပြန်တောင်းတယ်..။ ပေးတုံးက ဘာအနှောင်အဖွဲ့မှ မပါဘဲ ကိုယ့်သဘောနဲ့ကိုယ်ပေးထားတာပဲ ဆိုပြီး ခင်ဝင်းကြည်က ပြန်မပေးဘူး..။

ငွေငါးထောင် ပြန်မရကောင်းလားဆိုပြီး ၀င်းဖေက အလောင်းကြိုရောင်းထားတဲ့ အကြောင်း ရွာထဲ လည်ပြောတယ်..။ အစကတော့ ခင်ဝင်းကြည်နဲ့ သူပဲ တိုးတိုး တိုးတိုး ကြိတ်ညှိနေတာ..။ တိုးအောင် အလောင်း ရသွားပြီဆိုမှ.. မစားရတဲ့အမဲ ၀င်းဖေ သဲနဲ့ ပက်တာပဲ..။

ဓလေ့တစ်ခုလို ဖြစ်နေပေမယ့်လည်း.. မသေသေးတဲ့ မိဘကို ကြိုရောင်းသလိုမျိုး ဖြစ်သွားခဲ့ရတာကို တရွာလုံးက နှာခေါင်းရှုံ့ကြတယ်..။ ခင်ဝင်းကြည်ကတော့ ဘယ်သူတွေ ဘာပြောပြော ဂရုမစိုက်ပါဘူး..။ အဲ.. ဒါပေမယ့် ဖြစ်ချင်တော့.. ဦးအောင်ကြည်က မသေဘဲ.. နေပြန်ကောင်းလာခဲ့တယ်..။

ယနေ့အထိ.. တုတ်ကောက်တစ်ချောင်းနဲ့ ရွာမှာ ဦးအောင်ကြည် ဟိုဟိုဒီဒီ လျောက်သွားနေဆဲ ပေါ့..။

No comments: