မြန်မာပြည်က ဂျပန်ပြေးတော့ အဖေ နွားထိုးကြီးမြို့ပေါ်တက်ပြီး ကျောင်းနေတယ်..။ ကျောင်းက အင်ဂလိုဗနီကူလာ ဆိုတဲ့ အင်္ဂလိပ်စာသင်ကျောင်း ပဲ..။ အဖေကျောင်းနေစဉ်မှာ ဖဆပလအစိုးရနဲ့ ကွန်မြူနစ်၊ရဲဘော်ဖြူ ကွဲပြဲပြီး သူတလူ ငါတမင်း ကိုယ်ပိုင်ရာပိုင်ရာ နယ်မြေတွေ အုပ်ချုပ်ပြီး ဗိုလ်လုပ်ကြ တော့တယ်..။
နွားထိုးကြီးမြို့ကို အဲဒီတုံးက ဖဆပလ အစိုးရက အုပ်ချုပ်နေတယ်..။ အုပ်ချုပ်တယ်သာ ဆိုတယ်.. မြို့ပေါ်ကွက်ကွက်ကလေးလောက်သာ.. ဖဆပလ အာဏာစက်ရှိတယ်..။ နယ်ထဲက ရွာတွေကတော့ ကွန်မြူနစ်ရွာ ဖြစ်တဲ့ရွာကဖြစ်၊ ရဲဘော်ဖြူ ရွာဖြစ်တဲ့ရွာကဖြစ်နဲ့ ဖြစ်ချင်သလို ဖြစ်နေခဲ့တယ်..။ တဖွဲ့နဲ့ တဖွဲ့ အယောင်ဆောင် အပြစ်ဖို့ လုယက် ဓါးပြတိုက်တာတွေကလဲ မိုးလုံးပြည့်ပေါ့..။
ဖဆပလ အစိုးရ ဘက်တော်သားတွေ ကိုယ်နှိုက်က လစ်ရင်လစ်သလို ဓါးပြတိုက် လူသတ်လုပ်တယ်..။ လုပ်ပြီး ရဲဘော်ဖြူ လွှဲချတယ်..။ အဲဒါကို မခံနိုင်တဲ့ ရဲဘော်ဖြူရဲမေ မတင်က အဖေ့ကို မြှောက်ပေးတယ်..။ “ ရဲဘော် ဓါးပြလော၊ ဘမောင် ဓါးပြလော ” ဆိုတဲ့ စာရွက်တွေ နွားထိုးကြီး တမြို့လုံးမတင်မြှောက် ပေးတာနဲ့ အဖေလိုက်ကပ်တယ်..။
ဘမောင် ဆိုတာက ဖဆပလ လူကြီး..။
အကျိုးဆက်အနေနဲ့ ဖဆပလက အဖေနဲ့ မတင်ကို လိုက်ဖမ်းတော့တယ်..။ မတင်ကလည်း အုံးဖေ နင်.. ဒီအတိုင်းနေလို့ မရတော့ဘူး..။ ရဲဘော်ထဲ ၀င်ရင် ၀င် မ၀င်ရင် နင့်ကို ကာကွယ်နိုင်မှာ မဟုတ်တော့ဘူးနဲ့ ဆွယ်တယ်..။ တချိန်တည်းမှာ ဦးဘိုးလှိုင်တို့ ဘွားတင်တို့ ပိုင်ဆိုင်တဲ့ မြေတွေယာတွေ အိမ်တွေကို ရဲဘော်ဖြူက သိမ်းရုံမက အသက်ကိုပါ ရန်ရှာချင်နေပြီ..။
အဲဒီမှာ အဖေစဉ်းစားတယ်..။ သူ ရဲဘော်ဖြူထဲဝင်လိုက်ချင်းအားဖြင့် သူ့မိသားစုကို ကာကွယ်နိုင်မယ်..။ ဖဆပလကလည်း သူ့ကို လိုက်ဖမ်းနေပြီ..။ ဒီကြားထဲ သေနတ်ကိုင်ပြီး ပစ်ချင်ခတ်ချင် စိတ်ကလည်း ထိမ်းမနိုင်သိမ်းမရ ကြွထနေတယ်..။ အဲဒါနဲ့ပဲ ရဲဘော်ဖြူထဲ ၀င်ဖို့ ဆုံးဖြတ်လိုက်တော့တယ်..။
အဲသလိုနဲ့ အသက်ဆယ့်ခြောက်နှစ်သား မောင်အုံးဖေတစ်ယောက် သူပုန်ဖြစ်သွားခဲ့ရပါတော့တယ်..။
Subscribe to:
Post Comments (Atom)
No comments:
Post a Comment